Talleres del Conde

Les sos instalaciones llevantáronse sobre un allugamientu estratéxicamente asitiáu ente El Río Nalón y el ramal del ferrocarril del Norte qu’enllazaba Soto Rei y Ciañu-Santana, con concesión algamada pol Conde Sizzo. Les dotaciones incluyíen un fornu altu, talleres de calderería, axuste, fragua, carpintería, oficines y viviendes pa los operarios.

Nel 1902 la compañía queda integrada na Sociedad Metalúrgica Duro Felguera que, pasaos los años, acomete socesives obres d’ampliación y renovación de les instalaciones. Les reformas afeutaron, en particular, al fornu altu y a los talleres de calderería y axuste que, funcionalmente, taben venceyaos a la planta de La Felguera. Entrambes factoríes quedaben enllazaes al traviés d’una rede de víes internes. El caltenimientu de los talleres prollongóse hasta l’añu 1985 cuando, al igual que pasó col restu de los activos de factoría, prodúxose la so clausura definitiva.

Ente los testimonios escasos que se conservaron de los vieyos talleres tien especial interés la estructura metálica de les naves de calderería. Son dos monumentales naves apegaes, asitiaes sobre una base de formigón, con planta rectangular y dimensiones notables, con un llargor cercanu a los 200 metros, 11 metros de altura y 20 metros de lluz. Los apoyos, pilares compuestos de perfiles roblonaos, soporten les vigues sobre las que pasaría la ponte grúa. La cubierta, montada sobre una estructura de cerches triangulares d’aceru, ye a dos agües, con llinternón corríu y zarrada con plaques ondulaes de fibrocementu.

Dende la so clausura baraxáronse proyeutos diferentes pa la so rehabilitación y refuncionalización, que pasaron pela so tresformación n’espaciu ferial, equipamientu cultural y inclusive como parque temáticu, ensin qu’hasta güei nengún d’ellos prosperare y dexare dar una vida nueva a esti valiosu testigu del pasáu industrial llangreanu.

Natalia Tielve García