El primeru de los trés en terminase foi’l Taller de Calderería, compuestu por dos naves de doscientos cincuenta y dos metros apegaes de manera lloxitudinal, con una lluz que supera los venti metros en caúna d’elles. La estructura ye de formigón armao, emplegándose pa la cubierta arcos triarticulaos atirantaos prefabricaos que favorecíen l’apertura de llucernarios y, por tanto, la entrada de lluz natural al espaciu de trabayu. Na so fachada noroeste apegóse un cuerpu d’oficines y servicios pal propiu taller. Nel añu 2002 la estructura foi intervenida parcialmente polos arquiteutos Constantino Hurtado Mingo, Elena Prieto Palacios y Gorka López Pérez p’adautar ún de los llaterales de la nave como comedor pa obreros d’ArcelorMittal. Esti proyeutu permitió incorporar una estructura interior llevantada que favoreciere una integración nel conxuntu del inmueble.
El Taller de Fundición fórmenlu dos naves de venti metros de lluz y otres dos, combinaes coles anteriores, de dieciséis metros de lluz y cubierta plana. A la última d’ellas apegóse un cuerpo auxiliar p’agospiar les dependencies d’alministración y xestión del taller. El so llargor, dalgo menor que nel casu anterior, ye de ciento setenta metros.
L’inmueble últimu del conxuntu, el Taller Mecánicu, concluyóse tamién al rodiu del 1955. Confórmenlu cinco naves: dos de veintidós metros de lluz cubiertes tamién con arcos triarticulaos metálicos, trés naves de doce metros de lluz zarraes con una cobertura de dientes de sierra y, como nos casos anteriores, con un cuerpu anexu destináu a les oficines del taller.
Pol so interés arquiteutónicu formen parte del Catálogu Urbanísticu del Conceyu de Corvera, del inventariu de la Fundación Docomomo Ibérico y del Plan Nacional de Patrimonio Industrial.
Rubén Domínguez Rodríguez
Comentaris recents