La industria química n’Asturies

Los oríxenes de la industria química n’Asturies –fábriques de La Manxoya, Llugones y Cayés– han venceyase al impulsu que, na segunda metá del sieglu XIX, esperimenta la minería del carbón y la fabricación d’esplosivos. Iniciada la centuria viniente, el sector diversifícase escontra la fabricación d’abonu nitroxenao, al amparu de midíes proteicionistes que busquen francer, pelo menos parcialmente, la dependencia del esterior d’un productu n’ascensu, vital pal desendolcu d’una agricultura patria anclada polos baxos rendimientos. Nesti contestu constitúise, en 1923, la Sociedá Ibérica del Nitróxenu (SIN) en Vega (Llangréu), ún de los grandes centros productores del país. Les sos instalaciones modernícense y enánchense nos años cincuenta, con una nueva fábrica en Barros (Llangréu), nun contestu autárquicu que nun fixo otro qu’acentuar les bases proteicionistes del periodu anterior. Previamente, en 1921, la empresa hullera Carbones de La Nueva llevantaba en Camellera (Ciaño- Llangréu) una planta centrada na obtención de subproductos a partir de la coquización de la hulla (brea, nafta o creosota). Configurábense, d’esta miente, los pegollos d’un difusu polu carboquímicu na cuenca minera d’El Nalón que quedó completáu cola fábrica de Productos Químicos Sintéticos (PROQUISA) orientada a la producción farmacéutica.

Los años sesenta, dominaos no económico pol Plan d’Estabilización –señalando l’apertura al esterior y la definitiva implantación del petroleu y los sos derivaos– traerán consigo’l declive carboquímicu y la progresiva sustitución pola petroquímica. Asina y too, en 1969 y dientro de la Empresa Nacional Siderúrxica (ENSIDESA) ábrese en Tresona (Corvera) una fábrica de fertilizantes venceyada al ciclu integral de la siderurxa avilesina. Mientres que la SIN cesaba l’actividá nos años noventa, el restu de les fábriques caltuvieron le sos producciones pa diferentes mercaos mui especializaos.