Patrimoniu Ferroviariu: arquiteutura ya infraestructures

La temprana industrialización asturiana afaló la nacencia d’una rede ferroviaria que sirvió sobre manera a la minería y la siderurxa d’Asturies. De fechu, ún de los primeros usos documentaos de víes en territoriu español asítiase, en 1834, n’Arnáu. D’esta miente, a meta del sieglu XIX l’emplegu de carriles y vagonetes dientro de les galeríes yera un fenómenu conocíu y espardíu, cola apaición de trincheres y planos inclinaos que llegaron a crear estenses redes de tresporte en cascada aprovechando la orografía de los valles mineros. Dende 1860 surdieron tamién llinies mineres de ciertu llargor, como’l casu de la de Sama a El Sotón, que fixeron de tributaries de los ferrocarriles d’usu públicu.

El desendolcu de la rede ferroviaria d’usu públicu foi, sicasí, daqué más serondo, magar que tamién dependió de la industrialización. En 1852 entró en serviciu el Ferrocarril de Llangréu pa comunicar la cuenca hullera d’El Nalón col puertu de Xixón. L’anchu de vía peculiar y el complexu conxuntu d’infraestructures fixeron d’él un casu únicu na historia ferroviaria española.

La comunicación con La Meseta tuvo condicionada por factores xeográficos y coxuntures económiques, dende l’apertura del tramu La Pola (L.lena)-Xixón (1874) hasta l’acabu de les importantes obres de la rampla de Payares, diez años más tarde. Esti conxuntu completaríase poco dempués con dellos ramales que daben accesu a centros periféricos como Trubia o Avilés. Toa esta rede quedó en manes de la Compañía del Norte, antecesora de Renfe, qu’exerció un monopoliu con fondes consecuencies pa la industria llocal.

Pa cabu, d’a caballu ente lo cabero del XIX y empecipios del XX, texóse una rede de ferrocarriles de vía métrica construyíos como llinies de redolada (Ferrocarril del Carreño) o como alternatives al control de la Compañía del Norte pa la salida de carbones (Vasco-Asturiano). Nel casu d’Económicos d’Asturies, pasó de ser una llinia de calter llocal a convertise en parte d’una exa muncho mayor que percuerre cuasi tola Cornisa Cantábrica al ampliar la llinia hasta Llanes, como esllabón d’una cadena de llinies de vía métrica que lleguen a la frontera francesa. L’últimu finxu d’esti conxuntu foi la construcción seronda, apostalgada por avatares históricos, de la llinia Ferrol-Xixón, concebida como un ferrocarril estratéxicu qu’enllazare Asturies col arsenal gallegu y que nun s’acabó hasta 1972.