Pozu Monsacro

Nel 1905 Minas de Riosa tresmite toles sos propiedaes a dos compañíes franceses, Houllières de Ujo y Mieres y Societé Française des Charbonages de Laviana. Nel 1914 les mines nuevamente salen a puya, faciéndose cola empresa un grupu d’inversores asturianos ente los que taba una vegada más la familia Figaredo. La empresa pasa a denominase Hulleras de Riosa, S.A. 

Nel 1952 la empresa estatal ENSIDESA adquier Hulleras de Riosa p’asegurar el suministru de carbón a la so planta d’Avilés. ENSIDESA, que siguirá cola esplotación hasta la integración de los activos mineros n’HUNOSA, fadrá importantes obres de modernización de les instalaciones, incluyendo l’afondamientu del Pozu Montsacro. Los trabayos axudicáronse nel 1953 a la empresa constructora Entrecanales y Távora. Nel 1959 instálase’l castillete d’aceru soldao con un altor de 40,20 metros y entama la estraición regular del carbón. 

El pozu contó tamién con una mina-escuela onde los emplegaos recibíen formación enantes de la so incorporación. Pa ello construyóse una bocamina con dos accesos y una galería principal a la que s’abrieron dellos travesales pa la práutica del trabayu nel interior de la mina.

Una vez n’HUNOSA, el pozu quedó incorporáu nel Grupu San Nicolás, xunto con Nicolasa y Olloniego. La llinia de Ferrocaril de La Foz a La Perea, que diera serviciu a les mines de la zona, esmantelóse y el carbón trelladóse nun primer momentu per carretera; más tarde entraría en funcionamientu una cinta que comunicaba col pozu San Nicolás, dende onde se llevaba al llavaderu d’El Batán.

N’avientu del añu 2014 produzse’l pieslle del Pozu Montsacro, algamando una fondura de 350 metros con 7 plantes.

Mónica García Cuetos