Mines de L’Aramu

Les mines d'El Aramu asítiense nes cercaníes del llugar de Ḷḷamo (Riosa) y p’acceder a elles hai que xubir per un camín empedráu pindiu que parte de Rioseco. Ye una mineralización primaria formada por sulfuros complexos de cobre y cobaltu, con níquel, que s’esplotó de forma intermitente dende lo último del sieglu XIX a mediaos del XX, comercializando los productos arriquecíos nos dos primeros elementos.

La recuperación del cobre complementábase cola de los otros dos metales citaos. De primeres dedicóse a la esplotación la empresa The Aramo Copper Mines, Ltd., con diferentes altibaxos –dende’l 1893 hasta los entamos del sieglu pasáu–, y con posterioridá, hasta’l so pieslle definitivu nel 1955, pola entidá Minero Metalúrgica Asturiana. La primer sociedá llegó a beneficiar dalgunes escombreres antigües que conteníen del orde del 19 por cientu de cobaltu, pa con posterioridá esplotar por minería d’interior los constituyentes primarios, esencialmente centraos nel cobre. Anguaño, la compañía Asturmet Recursos fai prospeiciones na zona y otres próximes col fin de definir la rentabilidá del xacimientu pa cobaltu y cobre.

La mena encaxa na unidá litolóxica conocida como “Caliza de Monte” del Carboníferu y alcuéntrase en rellación con una falla teutónica de rumbu E-O. Consta de dellos filones (con un espesor mediu de 25 cm), dalgunos coincidentes cola orientación de la falla; la mineralización tamién ta asociada a rellenos arcillosos ricos en minerales secundarios qu’ocupen güecos kársticos (“soplaos”). El cobaltu identifícase en forma d’óxidos hidrataos, dalgo niquelíferos, arseniatos (eritrina) y sulfoarseniuros (cobaltita y esmaltita).

Nel Muséu Arqueolóxicu d’Uviéu guárdense esqueletos humanos que se cree finaron n’accidentes mineros, yá qu’entovía conservaben les ferramientes de trabayu al llau, asina como martiellos de piedra, cuernos de venáu, cuñes, cuchiellos de güesu, etc.

Carlos Luque Cabal y Manuel Gutiérrez Claverol