Mines d’El Terronal

Minería

Mines d'El Terronal

La Peña, Mieres

Esti xacimientu constituyó la esplotación más importante de mercuriu n’Asturies, con un beneficiu que se caltuvo unos 130 años. Entovía anguaño ye visible’l vieyu castillete mui estropiáu.

El campu mineru d’El Tarronal-La Peña, asitiáu a poco más d’un quilómetru al norte de Mieres, foi l’entornu mercuríferu asturianu más notable y sobre’l que se desendolcó’l mayor llabor rexonal del metal llíquido.

El primer rexistru pa mercuriu (“azogue”) n’Asturies presentóse’l 26 de setiembre del 1838 pol canónigu de la Catedral Manuel García Argüelles; taba nel paraxe de La Peña. Sicasí, a la muerte del clérigu produzse un llargu pleitu ente los sos herederos, pel que la demarcación de les pertenencies de la concesión La Peña nun se pudo facer hasta’l 12 de xunu del 1843.

Daquella nesti ámbitu trabayaben dos empreses: La Unión Asturiana, qu’aprovechaba esti xacimientu mierense con producciones de 4.000-4.500 quintales de cinabriu al mes (unos 960 frascos/añu), y El Porvenir de Asturias, con esplotaciones qu’abarcaben dende El Tarronal a La Peña, con una producción aproximada de la metá que l’anterior.

Hacia’l 1872 la empresa El Porvenir entamó a afondar el pozu La Peña y nel 1908 fíxose cargu del mesmu The Oviedo Mercury Mines, siendo sustituyíu por Astur Belga nel 1947, que recuperó los llabores. El vieyu castillete y la maquinaria d’estraición d’esti pozu cambiáronse nel 1953.

El mineral distribúyese en seis cuerpos conglomerático-brechoides (llamaos Esperanza, Aumento a Peña, Brecha Nueva, Peña 1, Peña 2 y Stol) dispuestos con una morfoloxía lenticular según una complexa estructura anticlinal, dientro de la serie estratigráfica del Carboníferu productivu (Grupu Sama).

El cinabriu repártese de forma irregular –tanto disperso como en filones pequeños– encaxaos nos mentaos niveles conglomerático-brechoides. Apréciase una concentración mayor de mena col incrementu de materia orgánico y carbonatos na matriz detrítica. Amás del sulfuru principal, apaecen otros de forma ocasional (metacinabriu, pirita, esfalerita, galena, estibnita, marcasita) y, de manera esceicional, Au nativu.

Carlos Luque Cabal y Manuel Gutiérrez Claverol

GALERÍA D'IMAXES