Mines de Llumeres

Asítiense na ensenada homónima (zona del Cabu Peñes, conceyu de Gozón). Anque pudieron ser esplotaes en tiempos prerromanos, n’época histórica entamaron a ser beneficiaes, de forma mui rudimentaria, nel 1858 pola Compañía Minera de Gozón, pa pasar a pertenecer, trés años más tarde, a la Sociedad Duro y Cía., qu’investigó’l campu mineru, amplió les concesiones y estableció una ordenada metodoloxía de llaboréu. Nel 1906 la entidá anterior fusiónase cola Sociedad Unión Hullera y Metalúrgica de Asturias, lo que trai un ameyoramientu de l’actividá, llogrando les mayores producciones (413.500 tonelaes ente’l 1907 y el 1915, más que nos 45 años precedentes).

La mineralización encaxa na Formación Furada (Silúricu Superior-Devónicu Inferior), constituyida fundamentalmente por tramos arriquecíos n’óxidos de fierro (hematites) con niveles d’oolitos abondoses, qu’alternen con capes d’arenisques menos riques en fierro y con pizarres.

El xacimientu estructurábase en seis pisos, nomando les capes a efeutos mineros de 1 a 5, anque sólo trés presentaben interés (2.ª, 3.ª y 4.ª). La capa 4.ª ye la más ancha (2,20 m) y rica (50-53% de fierro y 15% de síliz), siendo la única esplotada.

El tresporte del mineral hasta’l fornu altu foi ún de los mayores problemes. De primeres llevábase a un pantalán onde zarpaba en naves hasta’l puertu de Xixón, llugar nel que s’utilizaba la vía de tren pa conducilo hasta la fábrica de Duro en Llangréu.

Ente’l 1918 y el 1922 instalóse un cable aereu de 7,5 quilómetros que coneutaba Llumeres con El Regueral (al OSO de Candás); la finalidá yera treslladar el mineral en 75 canxilones hasta alcanzar el ferrocarril.

El beneficiu duró hasta’l 1967, añu nel que se peslló la mina. Les reserves reconocíes d’esti xacimientu estímense en 5 millones de tonelaes, llegando a 40 millones les reserves supuestes hasta la fondura algamada.

Carlos Luque Cabal y Manuel Gutiérrez Claverol