La Fábrica de Cobre

Minería

La Fábrica de Cobre

El Condao, Llaviana

La minería del cobre y el so tratamientu, magar que tien un ciertu desarrollu n’Asturies, tuvo siempre marcada pola riqueza metálica baxa de les menes, qu’impulsó al mercáu a la importación de mineral estranxero que, al empar, repercutía a la baxa sobre los precios de venta faciendo mui complicada la sobrevivencia de les iniciatives rexonales.

Yá nel 1833 un informe de la Real Sociedad Económica de Asturias desaconseya’l proyeutu d’instalación n’Arnáu (Castrillón) d’una fundición de minerales de cobre d’América polos grandes perxuicios que causaría a esta rama de la industria rexonal. Asina, serán esplotaciones pequeñes, dalgunes combinaes con instalaciones fabriles con ciertes pretensiones les que nazan na centuria. Una d’estes iniciatives, como toes con un calter marcáu d’aventura financiera, asolombraes quiciabes pola relevancia de les de Texeo (Riosa) redescubiertes por Van Straalen nel 1888, son les mines y fábrica de cobre d’El Condao, en Llaviana. 

Nel 1884 créase la Sociedad Romero Díaz y Compañía pal tratamientu del cobre arxentífero qu’estrayería nos montes vecinos de Peñamayor y d’El Crespón, dende onde se baxaría en caballeríes y con un cable aereu ensin fin de mil metros de llargor. El direutor de la fábrica será José Peiró y el sociu mayoritariu Romero Estringama y Sierra. Pa ello instalóse n’El Condao una gran nave industrial de mampostería y encintáu de lladriyu nos recercaos de los vanos dotada de tolos adelantos, como un modernu fornu (asitiáu na parte oeste), molín de lluz llétrico, siendo acaso una de les esperiencies pioneres d’illuminación llétrica en fábriques. A entamos del sieglu XX la planta pesllaría de manera definitiva, reutilizándose a partir del 1921 como taller de llocomotores del ferrocarril de Llaviana a Rusecu.

Del imponente edificiu principal queda anguaño la caxa de murios, pudiendo reconocese los sistemes de toma d’agua del Nalón. De les mines son visibles les escombreres y los fueyos de Llampaces onde la meteorización del mineral produxo cristales de malaquita que tapicen esta antigua aventura minera nel Altu Nalón. 

Faustino Suárez Antuña

 

GALERÍA D'IMAXES