Fábrica d’Esplosivos

Fundada nel llugar conocíu como Llamascura, el so orixe asítiase nel añu 1865, cola adquisición por parte del inxenieru belga Dionisio Thiry d’unos terrenos, la constitución de la Sociedad Dionisio Thyry y Compañía y la creación de la primitiva fábrica de pólvora. Na década del 1880, a partir de la xunión de la familia Thiry con un grupu d’inversores alemanes y industriales uvieínos –ente ellos los Herrero y los Palacio–, fúndase la Sociedad de Explosivos La Manjoya que, a la fábrica de pólvora, suma otra destinada a producir dinamita. Baxo la xestión del direutor Carlos Vetter, ente’l 1883 y 1890, la factoría amplíase sobre la terraza fluvial asitiada a los pies del monte de La Zoreda. 

Anque la sociedá se convirtió nuna de les más importantes productores d’esplosivos del país, la fuerte competencia colos productores de dinamita del momentu –como la Sociedad Anónima Explosivos del Cayés y la Sociedad Vasco-Andaluza-Asturiana de Explosivos de Chávarri y Tartiere– complicó la so situación. A partir del 1896 quedaba integrada na Unión Española de Explosivos. 

La Manxoya, n’estáu llamentable d’abandonu, amuesa güei los restos de diferentes edificaciones destinaes a polvorinos, fornos, almacenes, depósitos, talleres, oficines, viviendes pa los trabayadores y equipamientos sociales –ente los que taben instalaciones d’ociu y un espaciu pal cultu– cronolóxicamente escalonaos nel tiempu, dende la segunda metá del sieglu XIX hasta bien avanzáu’l sieglu XX. La edificación qu’agospiaba los polvorines determinaba la estructura organizativa y morfolóxica de la fábrica. La so rotunda volumetría xunida a la so gran estensión, unos 160 metros aproximadamente de llargor, imponía. El so perímetru dentáu xeneraba un volume discontinuu, con alternancia d’entrantes y salientes. Esta disposición dentada aprovechóse p’apegar construcciones de calter auxiliar, como casetes de vixilancia, vestuarios y montacargues.

Natalia Tielve García