Tresportes
Carbones Asturianos, qu’entamó les sos actividaes na década postrera del sieglu XIX, foi una de les empreses de tamañu medianu establecíes nel valle de Samuño. Pa estrayer la so producción contó con un ferrocarril de llargor escasu (dalgo más d’un quilómetru) ente la cabecera de les sos esplotaciones, cerca de La Puente Umeru, y el llavaderu asitiáu nes cercaníes de la estación de Samuño del Ferrocarril de Langreo.
L’anchu de vía, como nun podía ser d’otra manera, yera de 650 milímetros y el so trazáu diba paralelu al de Carbones de La Nueva, col qu’inclusive cruciaba a diferente nivel al traviés d’un pasu inferior.
A lo llargo de la so vida esta llinia contó con delles llocomotores de vapor de pequeñu tamañu. La última d’elles, que llevó’l númberu 8, adquirióla nel 1928 a la firma Orenstein & Koppel, una de les proveedores habituales de los ferrocarriles mineros asturianos.
Pertenecía al modelu normalizáu de 30 caballos de potencia, con dos exes motores y tanque d’agua nel bastidor. La so carauterística más sobresaliente yera la chimenea en forma d’embudu, dotada d’un parachispes pa evitar que l’escape pudiere producir quemes, lo que-y daba una nota exótica a un exemplar polo demás bastante convencional.
Tuvo una vida activa relativamente corta, yá que, na década del 1940, Carbones Asturianos principió a incorporar tractores diésel que dexaron a les llocomotores de vapor na condición de reserva y, por último, a la chatarra. La númberu 8 foi la única que se salvó del soplete, caltenida en funciones de reserva hasta la época d’HUNOSA. La empresa pública treslladóla como monumentu al vecín Pozu San Luis, onde permaneció bastantes años, pero finalmente llevóse al Pozu Fondón.
Ellí restauróla una escuela-taller y, inclusive, llegó a ponese en funcionamientu nes víes esteriores de la esplotación tres una reparación per enriba, iniciativa que nun tuvo continuidá. Anguaño caltiénse como monumentu énte l’edificiu qu’acueye l’archivu históricu de la empresa minera, que ta estudiando la so restauración y puesta en marcha para les visites.
GALERÍA D'IMAXES
Comentaris recents