Llocomotora Bilbao

Utilizada primero como llocomotora de llinia y, más tarde, en servicios de maniobres, llegó nel 1941 a manes de RENFE. Diez años depués, la empresa ferroviaria estatal vendióla a Fábrica de Mieres, onde con anterioridá tuviera alquilada. La so nueva propietaria dio-y inicialmente’l númberu 17, anque caltuvo’l so nome orixinal.

Utilizóse sobre manera pa remolcar los trenes de carbón que dende’l cargaderu de Barreo se dirixíen hasta la planta siderúrxica de la empresa y, más tarde, tamién al nuevu llavaderu de carbones d’El Batán. Esti cometíu convirtióla nuna protagonista cotidiana de les cais de Mieres, yá que bona parte del so percorríu diba pel centru del cascu urbanu de la población.

Nel 1961 sometióse a una importante reforma que-y dio’l so aspeutu actual, al tiempu que recibió’l so nuevu númberu 304. El tanque d’agua orixinariu asitiáu sobre la caldera y denomináu d’albarda, reemplazóse por unos tanques llaterales más convencionales. Otros detalles interesantes son les barandes colocaes nel frente que garantizaben la seguridá de los enganchadores nes maniobres y la presencia d’un aparatosu tope central pa vagones de vía métrica, yá que, amás de los de vía ancha, tamién remolcaba habitualmente vehículos pertenecientes al Ferrocarril Vasco Asturiano.

Nel 1967 pasó a manes d’HUNOSA y yá por entós yera la máquina más veterana de tol parque de la empresa minera. Retirada del serviciu a entamos de los años setenta, permaneció nes instalaciones d’El Batán hasta la so cesión al Muséu del Ferrocarril d’Asturies.

Anguaño ye la llocomotora más antigua que conserva la institución y una de les más representatives de los ferrocarriles mineros de vía ancha del Principáu.

Guillermo Bas Ordóñez