Llocomotora Pepe

Tresportes

Llocomotora Pepe

Parque Dorado, Sama, Llangréu

Mina La Camocha

371686978

Pozu San Luis

Monumento y Parque Dorado

374458184

Parque Dorado

522717683

Llocomotora Pepe

La PEPE construyóla nel 1927 la firma alemana Henschel pa la empresa Carbones de La Nueva, qu’afrontaba importantes ameyoramientos nes sos esplotaciones tres la compra per parte de la Real Compañía Asturiana. Eses tresformaciones non solo se materializaron n’obres como l’afondamientu del Pozu San Luis, sinón que l’adquisición de la PEPE taba destinada a ameyorar la capacidá de tresporte del so ferrocarril na seición inferior, que discurría ente La Puente Umeru y Camellera.

Pertenez a un modelu de catálogu del fabricante, nomáu ‘Monta’ y cuenta con dos exes, distribución esterior y tanque d’agua nel bastidor. El so anchu de vía ye de 650 milímetros, midida peculiar y endémica de los ferrocarriles industriales del valle d’El Nalón. Anque ye conocida popularmente pol so nome, llevó amás el númberu 6 y foi la postrer máquina de vapor adquirida por Carbones de La Nueva.

La so carrera foi un tanto especial, yá que se retiró del serviciu nuna fecha tan temprana como 1960 tres la incorporación de les nueves llocomotores diésel. Sicasí, quiciabes pola so potencia y por tar nun bon estáu, nun s’esguazó, sinón que se tuvo de reserva, condición na que pasó a manes d’HUNOSA

La empresa pública cambió la so política respeuto al ferrocarril de La Nueva, yá que decidió treslladar les máquines diésel a otres esplotaciones y volver a trabayar la llinia con traición vapor. Asina la PEPE regresó al serviciu activu per un espaciu curtiu de tiempu, que cola llegada de dos llocomotores procedentes de La Encarná quedó de nuevo como suplente.

Tres la clausura del ferrocarril metanes los años setenta, HUNOSA cedióla al Conceyu de Llangréu pa la so colocación como monumentu nel parque Dorado de Sama. Nel 2014 recibió la so última restauración cosmética, qu’incluyó un cambéu d’allugamientu y la instalación d’una valla que la protexe de posibles daños al tar en plena vía pública.

Depués del llamentable esguace de la llocomotora JUANCO (2008), la PEPE convirtióse na única representante del parque motor de Carbones de La Nueva y tamién nun exemplar clásicu de los diseños alemanes tan abondosos nes llinies mineres del Principáu.

Guillermo Bas Ordóñez

GALERÍA D'IMAXES