Llocomotora FM 102

Los apremiantes problemes financieros de la empresa lleváronla aína a la quiebra y el negociu adquiriólu Fábrica de Mieres, interesada sobre manera nel so carbón.

Pa la inauguración del ferrocarril, Minas y Fundiciones mercó cuatro llocomotores a la firma belga Saint Léonard. La primer d’elles, la númberu 1, tuvo en funcionamientu en Quirós hasta la segunda década del sieglu XX, cuando se treslladó a Mieres xunto con dos de les sos hermanes. Ellí emplegóse tanto nel tresporte de carbón dende Mariana y Baltesara a la fábrica y, especialmente, nes maniobres dientro del complexu siderúrxicu. Tamién s’utilizó nel ramal de Los Cribos o en xeres auxiliares como’l remolque de los coches de personal.

A lo llargo de la so vida activa sufrió dalgunes reformes qu’alteriaron la so fisonomía, amás del númberu 102, que se-y dio contra l’añu 1960. Retirada del serviciu activu poco depués, usóse nos sos tiempos últimos como reserva de la desfornadora de la batería de coque de la fábrica, polo que pasó socesivamente a manes d’UNINSA y d’ENSIDESA, salvándose del esguace.

Cedida por ENSIDESA al Conceyu de Mieres, recibió una primer restauración pa ser espuesta na casa de cultura llocal. Va dalgunos años rehabilitóse otra vuelta y colocóse nel so allugamientu actual.

Ye una pieza esceicional pola so trayeutoria histórica, como ún de los escasos testimonios de la siderurxa en Quirós, y tamién por ser la llocomotora más antigua que se conserva n’España d’anchu de vía de 750 milímetros. 

Guillermo Bas Ordóñez