Fábrica Fariña El Águila

La fábrica, llevantada por pidimientu de Juan Oría y Ortiz, aprovechaba un saltu d’agua n’El Ñora pa la producción fariñera. Contaba con un motor hidráulicu de noventa caballos de potencia, xunto con un motor auxiliar de sesenta caballos. Producía unos 20.000 quilos de fariña diarios, destinaos al mercáu gallegu y asturianu, y comercializaos baxo les marques Oria y Tres Estrellas. El so allugamientu amañosu, nuna zona relativamente bien comunicada, nel estremu suroriental de la villa y, en particular, la cercanía del puertu, facilitaba la comercialización de los productos. Na so redolada instaláronse otres factoríes –desapaecíes– como la fábrica de vidru d’Osorio y Cia.

Organizábase a partir d’un cuerpu central, destináu a oficines, y dos naves de planta rectangular anexes con cubrición a doble vertiente qu’acoyíen la maquinaria. Depués d’años ensin usu, el complexu reconvirtióse como llar del cuartel de bomberos y, más recién, rehabilitáu y acondicionáu –como ocurre con otres vieyes instalaciones industriales encabezaes pola Curtidora Maribona– p’acoyer el Centru de Formación Ocupacional d’Avilés.

Ente los elementos preservaos del conxuntu resulta particularmente reseñable, pola so calidá arquiteutónica, el cuerpu principal, qu’acoyía les dependencies alministratives.  Con una distribución n’alzáu en trés plantes y zarros de mampostería enllucío, presenta cubierta a dos agües. La fachada principal, enmarcada por dos pilastres remataes con xarrones decorativos, preséntase articulada per aciu de faxes y impostes de piedra. Nella ábrense vanos de bon tamañu, organizaos por pisos, con remate n’arcos rebaxaos y de mediu puntu, qu’incorporen motivos decorativos xeométricos. Corona la fachada un pretil, sobre un óculu o güeyu central, nel que se coloca’l nome de la empresa y sobre’l que s’asitia un águila, a mou d’emblema.

Natalia Tielve García