Buscando la integración harmónica nel entornu –natural y cultural– el pobláu llevántase en dos fases, nos años 1961 y 1968. Na primer etapa constructiva constrúise un grupu de catorce viviendes apegaes, a una sola altura. De volumetría cúbica y acabáu blanco, incorporen cubierta a dos agües de pizarra con pendiente contra l’interior. Adóptase na so planificación un esquema d’edificación perimetral, permitiendo dexar un espaciu interior priváu, axardináu, d’usu comunitariu y protexíu del aire. Ye un plantegamientu asemeyáu al que s’atopa nel pobláu de La Ribera, concebíu pol mesmu arquiteutu pa los emplegaos de la central térmica de Soto Ribera. Al rodiu l’espaciu central los inmuebles colóquense de forma reculada, adaptándose a la pendiente del terrén y a la forma irregular de la finca. Les viviendes llevántense sobre una plataforma de formigón, baxo la que s’asitien trasteros, tendales, zona de xuegos y cocheres. No que respeuta al programa de los agospios, adóptense cinco soluciones diferentes col propósitu d’afayase tanto a las necesidaes de los diversos grupos familiares como a les categoríes socio profesionales a les qu’éstes queden destinaes.
Nuna segunda fase proyéutense doce viviendes, allugaes nuna cota más alta. Agrúpense dando llugar a cinco bloques apegaos, desendolcaos n’alzáu en dos y trés pisos. No qu’a soluciones constructives, materiales y aspeutos formales se refier, reproducen los esquemes de les viviendes apegaes. Llevántense sobre dos plataformes de formigón escalonaes: la inferior acueye les cocheres y núcleos d’escalera, mientres que sobre sobre la superior, llixeramente volada, acomódense los bloques de pisos.
Con too, al igual qu’asocede con otros poblaos diseñaos por Álvarez Castelao, el de Navia ye un exemplu atináu d’equilibriu ente organicismu y racionalismu.
Natalia Tielve García
Comentaris recents