Naves de Balsera

Les trés naves nes que se vertebra’l conxuntu, de fábrica de mampostería enllucida, adopten una alliniación perpendicular con respeuto a la ría. El complexu incorporaba orixinalmente un volume de menores dimensiones, llocalizáu nel estremu septentrional, que cumplía funciones auxiliares. Resulta especialmente notable’l cuidáu diseñu de la so fachada principal, proyeutada hacia la ría, harmonizando funcionalidá y adornu. Los llienzos organícense al traviés de pilastres planes percorríes por motivos xeométricos, ente les que s’asitien los vanos, combinando distintes soluciones de remate y tamañu diferenciáu. La nave central incorpora miradores zarraos n’altura y un balcón de barandiella que descansa sobre ménsules na parte superior, coronada con frontón curvu molduráu. Nel interior, diáfanu, hai columnas pequeñes de fierro sobre les que descansen les cerches metáliques que tienen pola cubierta, desendolcada a doble vertiente. Anima los zarros la incorporación de filaes de lladriyu visto, con xuegos xeométricos, imperceutibles anguaño col revocáu nuevu de los murios. Cubriendo los accesos colocábense marquesines planes.

Depués d’años ensin usu, fracasaes delles propuestes de reutilización –hotel d’empreses, sede del archivu históricu d’ENSIDESA, centru d’ociu, muséu de la industria…– güei les naves siguen ensin contar con un futuru escritu. Nel añu 2015 entamáronse unos llabores de llimpieza y sustitución del revocáu de les fachaes, aplicándose una aséptica capa de pintura blanco –al igual que na mallograda Pescadería Municipal–homoxeneizando –y adulterando– estéticamente l’entornu de la ría a imitación del Centro Niemeyer.

Natalia Tielve García