Consecuencia del tamañu y la diversidá de la rede ferroviaria del Principáu, llegó hasta nós un bon conxuntu d’esti tipu de vehículos que conserva, convenientemente restauraos, el Muséu del Ferrocarril d’Asturies.
Ente ellos rescamplamos los vagones zarraos, formaos por una caxa techada de madera con puertes correderes nos llaterales na que se trensportaben mercancíes xenerales, dende alimentos a paquetería. Ye’l casu del Efh 59 de vía estrecha (procede d’Económicos de Asturias) y del Jfv 303215, de vía ancha y orixinariu de RENFE.
Otru tipu ye’l de les plataformes, vehículos formaos por un batidor y un tableru superior que tamién s’emplegaben en toa clase de cargues, dende grandes bultos a carriles. Ye’l casu d’un exemplar de bogies procedente de la tresformación d’un remolque del Ferrocarril del Carreño, un esponente de cómo les empreses ferroviaries reciclaben el so material vieyo pa usos nuevos.
El tresporte de carbón requería d’unos vagones especialmente dedicaos. Los dos tipos más habituales foron los de bordes altos, con una caxa prismática abierta na so parte superior y que se descargaben per aciu d’un frontal abatible. Bon exemplu d’ello ye’l 2Vv 2218-12, orixinariu del Ferrocarril Vasco Asturiano y construyíu con estructura metálica.
Otres llinies contaben con vagones-tolva, provistos d’una caxa tronco-piramidal invertida con una trampiella na so parte inferior que permitía una descarga rápida. Ún d’ellos ye’l T43, construyíu pa Fábrica de Mieres con anchor de 750 milímetros y diseñáu pola propia empresa.
Guillermo Bas Ordóñez
Comentaris recents