Viviendes pal control de los obreros

Dende los primeros tiempos de la industrialización asturiana, encabezada poles fábriques d’armes d’Uviéu y Trubia, el problema de la vivienda pa los obreros foi recurrente. Empreses de promoción pública y privada, pertenecientes a los más estremaos sectores, enfotáronse en desendolcar proyeutos de vivienda y servicios xuntos en poblaos que, nel casu asturianu, ufierten unes propuestes tipolóxiques estremaes condicionaes pola cronoloxía y les pretensiones de caúna de les empreses.

Asistimos a la nacencia de la industria en fasteres, munches vegaes, despoblaes. Esti factor, amestáu al éxodu del momentu, afala que, como en Trubia, nazan nuevos noyos de población inclusive dientro del recintu productivu nes sos fases primeres. Les polítiques paternalistes (nes que s’inxerten la vivienda, l’ociu, los servicios, etc.) tienen como única pretensión la d’afitar nun determináu llugar a los trabayadores y, al empar, favorecer la creación d’un clima de bienestar que, consecuentemente, repercuta nuna mayor eficacia na producción.

El desendolcu industrial n’Asturies favoreció l’apaición de plantes fabriles de mui estremáu calter. Dende la producción d’enerxía a cargu d’Hidroeléctrica del Cantábrico hasta la siderurxa encabezada por ENSIDESA, afaló l’apaición de viviendes. Bonos exemplos pueden ser los poblaos d’A Peicega par la central de Grandas de Salime o les construcciones asociaes a la de Miranda.

Tolos exemplos dicen con tipoloxíes estremaes nos que vemos la pervivencia d’elementos autóctonos como en Llaranes o en Trubia y otros con mayores pretensiones artístiques, como nel Barriu Urquijo de La Felguera, d’Enrique Rodríguez Bustelo o nel pobláu de la central térmica de Soto Ribera, d’Ignacio Álvarez Castelao.

Del historicismu al racionalismu, constitúin toos estos exemplos testimonios de necesaria conservación pa entender la historia recién d’una Asturies que dispunxo estes ciudaes pal control sobre los obreros.