Xalé d’Inxenieros SIN

Industries

Xalé d'Inxenieros de la SIN

La Vega, La Felguera, Llangréu

Orientada hacia la producción de fertilizantes agrícoles, la Sociedad Ibérica del Nitrógeno instálase en Vega (Llangréu) nel añu 1925. Nes cercaníes de la factoríes llevántase, avanzada la tercer década del sieglu XX, un xalé destináu a servir como agospiu pa los inxenieros de la sociedá.

L’inmueble, de dimensiones notables, ta nuna cota elevada sobre la fábrica, adoptando una posición de dominiu sobre ésta. N’alzáu, organízase en suétanu, planta, pisu y sobráu. Con una superficie construyida cercana a los 400 metros cuadraos, la planta desendólcase en forma de ‘L’. No que se refier al programa, el suétanu acoyía les instalaciones de serviciu –carbonera, bodega y llavaderu–, la planta dedicábase al agospiu del inxenieru direutor –con estragal, comedor, cuartu de tar, cocina, cuatro cuartos y baños– y el pisu servía de residencia a inxenieros solteros, calteniendo una distribución asemeyada a la de la planta inferior. 

Na década del 1950 l’arquiteutu municipal de Llangréu, Julio Galán, faise cargu d’un proyeutu de reforma del edificiu col envís d’afayalu pal agospiu d’emplegaos de la sociedá. Los trabayos desendólquense de forma paralela a les obres constructives d’un conxuntu de cases pa inxenieros de la firma, asitiaes nes cercaníes de la nueva planta de Barros. 

Como resultáu de la reforma, modifícase la distribución interior del inmueble acordies coles necesidaes plantegaes, pero tamién s’introducen cambios na fachada. Incorpórense acabaos nuevos: aplacaos de piedra nes esquines y moldures de yelsu qu’imiten l’apariencia de madera. Estos elementos, xunto coles contraventanes de madera que zarren parte de los vanos y la solución de cubierta, a delles vertientes, con faldones rotos, dan al edificiu un ciertu aire rexonalista montañés de posguerra, próximu al qu’atopamos n’otros diseños del arquiteuto Galán. 

Llueu de dellos años ensin usu y con deficiencies graves de conservación, l’edificiu rehabilitóse y afayóse como centru xeriátricu, función que caltién anguaño.

Natalia Tielve García

 

GALERÍA D'IMAXES