Viviendes de Conde Sizzo

El Hotel de Conde Sizzo, concluyíu nel añu 1918, asítiase nuna parcela axardinada y zarrada por una valla de fierro. Consta de dos inmuebles apegaos per medianera, con un retranquéu en planta, distribuyíos en trés altures más suétanu. Remata nun espaciu con bufardes, convertíu en terraza na trasera. La solución de cubierta, con pendiente inclinada, da-y ciertu traza centroeuropea. No que se refier al tratamientu de fachaes, ye sorrayable l’escalonamientu de los vanos, desiguales nel so asitiamientu y tamañu, xugando con agrupaciones diferentes, incluyendo un par d’estructures en voladizu a mou de balcón puestes nos llaterales de la fachada principal.

Completen el conxuntu de viviendes pa inxenieros de la SMDF na cai Conde Sizzo los grupos de xalés trazaos, yá na posguerra, na década del 1940, polos arquiteutos Francisco y Federico Somolinos. Son cuatro agrupaciones de viviendes, asitiaes dos a dos, de manera perpendicular en caún de los llaos de la cai, con xardín na zona trasera. Con planta cuadrangular y diseñu cuidáu, los agospios distribúyense n’alzao en semisuétanu, planta baxa, alta y desván. De dimensiones amplies, cada vivienda constaba d’antepar, sala, comedor, cocina, despensa y oficina, na planta baxa, mientres que nel pisu había cuatro cuartos y baños. Los xalés cúbrense a delles vertientes, con chimenees intercalaes nos teyaos. Animen la composición cenciella de fachaes los recercaos de los vanos y los balcones en voladizu asitiaos n’altura, zarraos con valla de fierro.

Natalia Tielve García