Viviendes d’Inxenieros

L’autor del proyeutu, l’arquiteutu Ignacio Fiter Clavé, firmólu en Madrid nel añu 1957. La so propuesta pretendía edificar cuatro bloques de viviendes, un edificiu de bar y llar del guarda del recintu y una residencia d’inxenieros, destruyida en feches recientes. Los inmuebles de residencia asitiáronse con pequeñes modificaciones d’orientación con respeuto al proyeutu inicial, pero calteniendo la orixinalidá del diseñu. Les sos dos tipoloxíes comparten carauterístiques formales y materiales (revestimientu de piedra pal primer pisu y lladriyu visto pal restu) pero se distinguen na morfoloxía de les sos plantes. Ún d’ellos, el tipu B, de planta rectangular y otru, el tipu C, de planta angular cola so entrada principal en chaflán. 

La calidá de los materiales emplegaos y de los elementos de diseñu desendolcaos son acordies al estatus social de los sos inquilinos dientro de la empresa. Estos edificios cuenten con mobiliariu y carpinteríes diseñaes pol propiu Fiter, que llucen metanes portales amplios con paredes revestíes de mármol d’Escobedo pulío. Les zones comunes de les socesivas plantes tán illuminaes pola lluz natural filtriao al traviés de los bloques de vidru pavés, y los pisos superiores remátense, al esterior, con llucíes pérgoles de madera.

La residencia y el club d’inxenieros asitiábense na esquina suroriental de la finca. Fiter plantegó dos edificios coneutaos ente sí, anque aparentemente independientes. L’accesu principal facíase per una construcción de marcada horizontalidá y planta llixeramente curva asitiada en paralelo a la cai González Abarca, precedida d’una escalinata cubierta, de la mesma, por una visera trilobulada. Al so llau, un edificiu de gran verticalidá con seis altures. Esti conxuntu tiróse embaxo a mediaos del añu 2007, ensin que se fixera entovía nengún tipu d’intervención nel so valiosu suelu.

Rubén Domínguez Rodríguez