Acería Martin Siemens

La estructura metálica del inmueble ye la primera de la so clase na factoría de la Empresa Nacional Siderúrgica, S.A (ENSIDESA), y precedente inmediatu de les trés aceríes LD de la mesma planta. La cimentación de los más de cien mil metros cuadraos qu’ocupa foi más complexa que nel restu d’edificios y nella emplegáronse ciento dos campanes y más de trés mil pilares.

La función principal d’esti espaciu, dientro del procesu siderúrxicu, consistía n’aplicar les teunoloxíes acionaes pa la obtención d’unes 800.000 tonelaes añales d’aceru, utilizando como materies primes l’arrabiu producío nos Fornos Altos, chatarra, caliar, cal y, como combustibles, gas y alquitrán derivaos de la producción de cok. Esti métodu de fabricación d’aceru creáu por Carl Wilhelm Siemens y por Pierre-Émile Martin perdió progresivamente’l so pesu industrial col desendolcu del métodu de Linz-Donawitz (LD).

La planta ta compuesta por trés naves, con lluces comprendíes entre los venti y los cuasi ventiséis metros, d’altures diferentes pa facilitar la ventilación y la entrada de lluz natural. La primera agospiaba los fornos basculantes y l’amesturador, y contaba con dos pontes-grúa. La segunda, destinada a la realización de les colaes, contaba con cuatro pontes-grúa de ciento cuarenta tonelaes caún que manexaben les cuyares de cien tonelaes de capacidá y, al empar, disponíen el so conteníu sobre trenes-lingoteres dirixíos a Fornos de Fuexa. La última nave cumplía una función d’almacenamientu de los materiales necesarios pa la producción.

L’Acería Martin-Siemens adscríbese a los parámetros del Movimientu Modernu, con interiores diáfanos y versátiles, de llinies reutes y volúmenes claros. Tres el cese productivu reconvirtióse en taller de calderería pa la ellaboración de fustes pa torres eóliques, calteniendo las seis chimenees de lladriyu orixinales nuna rehabilitación dafechamente respetuosa colos valores orixinales del edificiu.

Rubén Domínguez Rodríguez