Vieya Pescadería Municipal

De planta rectangular, con cubierta a dos agües montada sobre una estructura de cerches metáliques, la fachada principal quedaba organizaba en trés cais. La central, privilexada n’altura, víase enmarcada por pilastres con remate piramidal y coronada por un petu de cubierta reutu. Un arcu de cristal sobre carpintería metálica percorría’l paramentu, dando unes condiciones de lluz escelentes al interior, onde, al rodiu d’una cai central, s’asitiaben los puestos de venta.

Magar que contare con un grau de Proteición Integral nel Catálogu Urbanísticu municipal, la vieya Pescadería foi oxetu d’una de les más desafortunaes y agresives intervenciones feches na ría avilesina. Inscrita nel marcu del proyeutu de reforma integral de la Plaza de Santiago López, l’actuación desendolcóse ente los meses d’avientu del 2009 y xunetu del 2010, siguiendo’l proyecto del arquiteutu Aitor López Galilea, en collaboración col inxenieru Raúl Escrivá.

La intervención acometida dio como resultáu un edificiu azarzanáu y anuláu, tanto funcional como estéticamente, p’acoyer una pasarela peonil d’aceru corten – popularmente conocida como ‘La grapa’– que conduz al Centro Niemeyer. D’esti mou, l’antigua pescadería tresformóse en pura estructura portante d’una pasarela que podría asitiar el so arranque nel centru de la plaza, ensin mayor dificultá, y evitar fender l’edificiu históricu.

L’actuación estendióse a la plaza, eliminando l’arboláu. Cegáronse los vanos del inmueble y incorporóse un revocu d’aséptica pintura blanco, distante de los tonos azules y mariellos que presentaba enantes de la intervención: un color blando qu’introduz un miméticu diálogu col Centro Niemeyer. Una práutica “homoxeneizadora” que, sistemáticamente, se procuró estender a otres edificaciones asitiaes nel entornu de la ría.

Natalia Tielve García