Vieya Pescadería Municipal

L’inmueble, de dimensiones xeneroses, sigue’l proyeutu fechu pol arquiteutu Miguel García de la Cruz na collaboración col inxenieru José María Sánchez del Vallado. Con estructura de formigón armao y planta rectangular, ocupa una superficie de 1.100 metros cuadraos. La so fachada ábrese a cuatro cais, orientándose la principal hacia La Playa San Llorienzo. Los murios, elevaos en piedra caliar, con tableros de mármol blanco, apaecen abondosos calaos con amplios ventanales que proporcionen condiciones d’illuminación ventayoses al interior. N’alzáu organízase en semisuétanu y planta. Los puestos pa despachar el pescáu –mayoritariamente llevaos por muyeres–   asitiábense na planta principal, con pisu de mosaicu, mientres que nel semisuétanu se llocalizaben los de venta de mariscu y pescáu menudo. Nesti nivel inferior tamién atoparon abellugu los montacargues que permitíen alzar la mercancía, llavaderos, almacenes, cámares frigorífiques, una sala de puyes y baños.

L’actividá de la vieya pescadería prollongóse hasta entamos de la década del 1990. Una vegada clausurada baraxáronse dellos proyeutos pa la so reutilización: un casinu, un acuariu, un balneariu, un restorán… Una socesión d’idees que se refugaron hasta que, finalmente, se tomó la decisión d’acondicionala como espaciu de calter alministrativu venceyáu al Conceyu.

Non llibre de polémica foi la rehabilitación fecha nel inmueble. Los trabayos executaos, nel 1996, baxo la direición del arquiteutu Javier Calzadilla, llevaron al caltenimientu del edificiu –como aspeutu positivu– pero preservando esclusivamente la fachada y vaciando l’interior, siguiendo la tónica del ‘fachadismu’ tan común por desgracia nes reconversiones d’edificios industriales que nos años últimos s’entamaron n’Asturies

Natalia Tielve García