Casa de Direición SMDF

Ye un edificiu espléndidu, cuidáu de manera esquisita nes sos traces, nel que resulta solliñable la carga escenográfica de la so fachada principal. L’inmueble, no que se refier a la so distribución, adopta una planta en ‘L’, con entrantes y salientes. N’alzáu organízase en dos altures: na planta baxa asitiábense l’estragal, que comunicaba col hall, xunto col comedor, la cocina, l’office, el gabinete y un bañu, mientres que’l pisu, que cubría apenes una cuarta parte de la superficie del inmueble, acoyía los cuartos. El tramu de mayor desendolcu llonxitudinal ye percorríu por una galería nel so frente, mientres que la fachada llateral, elevada a mayor altura, cuenta cola puerta d’accesu a la vivienda, con un pórticu teníu por columnes de seición cuadrada con capiteles xeométricos. Na fachada principal, la seición correspondiente a la galería anímase con agrupaciones de trés ventanas molduraes, xugando nos motivos decorativos con elementos xeométricos. La solución de cubierta adoptada, plana, permite la organización d’una terraza con barandiella que percuerre l’edificiu. Como elementu singularizáu, na fachada llateral colócose un caprichosu remate en forma de torre.

Na década del 1930 l’edificiu reformóse pal so afayamientu como residencia d’inxenieros, ganando un pisu n’alzáu nel ala llonxitudinal y modificando la so distribución interna. Tres dellos años en desuso, la titularidá del inmueble pasó al Conceyu de Llangréu y rehabilitólu una escuela-taller. Acondicionáu tiempu depués como establecimientu d’hostelería, ensin merma de los sos valores históricos, caltién esti usu anguaño.

Natalia Tielve García