Minería
La riqueza minera d’esta zona de Siero yera conocida dende antiguu y entamara a esplotase en distintes zones d’una forma más o menos industrial y capitalista a partir de mediaos el sieglu XIX, cuando l’apertura del Ferrocarril de Langreo aportó una ventaya comparativa a estos cotos hulleros pa sacar la so producción hacia’l puertu de Xixón
Pero non toles mines yeren igualmente rentables y, de fechu, les de Saús quedaron pronto en suspenso. Equí iniciará la so andadura la sociedá familiar Hermanos Felgueroso, creada nel 1893 pa facese cargu d’estes mines, a les que sumaríen llueu otres en Llaviana y en Samuño (Llangréu).
A lo primero del sieglu XX les mines de Saús emplegaben 260 trabayadores, ocupaben 185 ha y producíen 34.000 tm d’hulla a lo llargo de dellos pisos de monte, sacando la producción pel Ferrocarril de Langreo en Boca Sur al traviés d’un ramal de vía estrecha. A partir del 1914 la producción concéntrase per debaxo del nivel del valle al traviés de trés pozos planu servíos por enerxía a vapor pa la estraición de los vagones. Pa ello se construyó una central térmica, una sala de calderes, cases de bañu… En Saús, onde se llega per una agradable sienda qu’aprovecha’l vieyu ramal mineru, entá perviven dellos d’estos elementos, incluyida la casa onde residieron los propietarios o la escuela, onde rescampla la imponente chimenea.
Nel 1919 estes mines, como’l restu del patrimoniu mineru de los Felgueroso asitiaos “al sur d’El Río Nora”, cómprales la Sociedad Metalúrgica Duro Felguera, que les clausurará a entamos de los años 1930 dientro del so decisivu programa de sustitución de la minería de monte por grandes pozos verticales. Nesti casu, pol de Mosquitera.
GALERÍA D'IMAXES
Comentaris recents