Central d’Arbón

N’Arbón adquier una relevancia singular el tratamientu de la lluz. Asina, Castelao dota d’una lluminosidá impecable al edificiu de la sala de máquines: una nave de dimensiones allargaes, cubierta por una socesión de bóvedes de formigón, a la que la lluz accede tanto llateral como cenitalmente. La fachada compónse a partir de pieces de formigón plegaes y desplazaes na so exa horizontal, a fin de permitir apertures de pasu de lluz. Baxo la sala de máquines, la planta d’alternadores, pronunciada n’altura, presenta como elementos sustentantes columnes estilizaes con capiteles campaniformes, de los que surden casetones triangulares insertos na cara interior del forxáu. L’arquiteutu sírvese amás del emplegu del color, aplicao de manera puntual nes cabeces de los alternadores y dalgunos elementos metálicos, frayando cola monotonía del gris qu’imprenta’l formigón. Un elementu a mou de pasarela, onde se llocalicen les oficines y el cuadru de mandos, enllaz col edificiu auxiliar qu’acueye’l restu de les dependencies. Al esterior, introduzse un sutil contraste de testures, combinando l’acabáu de formigón visto col gres de tonos blancuxos y el revestimientu de fábrica de lladriyu del edificiu auxiliar. 

Con destín a los emplegaos de la central, Castelao proyeutó coles mesmes un pobláu en Navia, llevantáu en dos fases ente los años 1961 y 1968. Nun primer estadiu planificóse un grupu de catorce viviendes apegaes de planta única, retrancaes unes con respeuto a otres. Adoptóse como solución una edificación perimetral que permitía dexar un espaciu interior priváu d’usu comunitariu. Nuna segunda fase proyeutáronse doce viviendes en cinco bloques apegaos, de dos y trés altures, asitiaos nuna cota más alta.

Natalia Tielve García