Ciudadela Celestino Solar

Los salarios reducíos, la inestabilidá llaboral y la ufierta escasa de vivienda tán detrás de l’apaición d’esta tipoloxía residencial que, destinada de manera preferente a obreros, se construyía nos patios de bloques de les zones d’enanche, quedando oculta a la vista de toos dende la vía pública. Nun espaciu insuficiente, les ciudadeles agolpaben agospios mui humildes, agrupaos en batería, elevaos a una sola altura, fechos en mampostería y con tabiques de lladriyu, que compartíen los servicios hixénicos y que contaben con una superficie reducida, como muncho 40 metros cuadraos. La so distribución interna yera mui cenciella: polo xeneral constaben d’un pasillu al rodiu del que s’asitiaben cuatro cuartos –cocina, dos dormitorios y sala–, de los que dos yeren esteriores y otros dos ciegos. Les cases ocupábense en réxime d’alquiler.

El númberu de viviendes coles que les ciudadeles contaben oscilaba ente dos y la ventena. En concretu, la de Celestino Solar, tamién conocida como ciudadela de Capua, comprendía venticuatro cases que s’habitaron ente los años 1877 y 1975. Construyida nel centru del bloque llendáu poles cais Ezcurdia, Capua y Eladio Carreño, taba organizada en trés bateríes de viviendes y dos patios. L’accesu al recintu facíase al traviés d’un caleyu estrechu, dende Capua, tapando la so vergoñosa presencia a los que pasaben pela cai principal. Xunto a las cases instaláronse cuatro retretes, un llavaderu y un pozu, les úniques dotaciones básiques esistentes na ciudadela y que teníen de compartir los sos vecinos, un promediu de cien.

Recuperada como espaciu musealizáu, dependiente na so xestión del Muséu del Ferrocarril d’Asturies, na ciudadela de Celestino Solar ye posible observar anguaño les traces de dalgún de los agospios.

Natalia Tielve García