Coche HT RN

Pa dar esti serviciu nel 1896 la empresa adquirió un lote de coches de segunda mano orixinarios del Ferrocarril Santander-Solares, fabricaos pocos años enantes por Usines Ragheno en Malines (Bélxica). Cuatro d’ellos yeren de tercer clase, con bastidor de fierro y dos exes. Teníen una caxa de madera con capacidá pa unos 50 viaxeros sentaos en bancos de madera y l’accesu facíase per balcones abiertos nos sos estremos. El quintu vehículu yera un coche pa emplegaos con asientos tapizaos y nengún llevó matrícula dalguna, yá que namái llucíen una pintura de color verde escuro.

A lo llargo de la so carrera, los coches de tercera esperimentaron delles reformes que dieron tosquedá al so aspeutu orixinariu: perdieron el frenu de vacíu y la illuminación interior orixinales, asina como’l forru esterior de la caxa, sustituyida por tablines verticales. Por último, modificáronse los rodaxes de fábrica. Too ello fíxo-yos perder parte del confort orixinal, pensáu pa treslladar a viaxeros al balneariu cántabru, un usu mui alloñáu del acarretu de mineros que facíen n’Asturies.

El serviciu de viaxeros caltúvose hasta los primeros tiempos d’HUNOSA, cuando se suprimió énte la xeneralización del automóvil priváu y la llegada de los autobuses urbanos. La mayoría de los vehículos quemáronse, pero ún de los exemplares de tercer clase llogró sobrevivir nes instalaciones de La Cuadriella hasta’l 1997, momentu nel que’l Muséu del Ferrocarril lu recuperó. Posteriormente rehabilitóse y anguaño circula per dicha institución pa gociu de los visitantes.

Ye una pieza d’elevadísimu valor, yá que son contaos los coches de viaxeros de vía ancha del sieglu XIX conservaos n’España.

Guillermo Bas Ordóñez