Llocomotora FL30

L’exemplar que nos ocupa, la númberu 30, entregóse nel 1910 y la so carrera entamó d’una forma mui brillante: yá nada más salir de fábrica unvióse a la Esposición Universal de Bruxeles, onde figuró nel puestu del so constructor. Terminada la muestra, embarcóse por fin con destín a Asturies.

La conceición d’estes máquines yera la clásica que’l Ferrocarril de Langreo utilizó per cuasi un sieglu: exemplares de trés exes acoplaes, que yeren aptos tanto pa realizar trenes de llinia como pa facer maniobres nos diversos cargaderos de carbón del percorríu. El so tanque d’agua d’alforxa, eleváu sobre les ruedes, daba-yos un aspeutu poderosu y mui carauterísticu. A lo llargo de la so vida útil, estes llocomotores demostraron una gran fiabilidá y emplegáronse en toa clase de servicios, dende viaxeros a trenes carboneros, nes dos seiciones nes que quedaba dividida la llinea del Langreo pel planu inclináu de La Florida.

Permanecieron en serviciu hasta la incorporación de les primeres llocomotores diésel metanes la década del 1960. Sicasí, la empresa caltuvo la númberu 30, xunto cola so hermana la 31, pa facer maniobres n’Aboño, onde sobrevivió hasta la época de Feve. Retiraes entrambes nos años setenta, quedaron abandonaes na estación vieya de Xixón y, posteriormente, treslladaes a la vecina estación de Renfe, per entós embrión del futuru Muséu del Ferrocarril d’Asturies.

Incorporada a los fondos d’esti últimu, restauróse cosméticamente y figura como ún de los sos elementos espositivos más visibles dende la so apertura nel 1998. La so hermana ximielga, la númberu 31, forma parte tamién de la coleición del muséu, pero ta a la espera de restauración.

Guillermo Bas Ordóñez