Cuarteles de La Formiguera

Llevántense sobre unos terrenos, cercanos a la desapaecida capiella de la Nuestra Señora de les Nieves, adquiríos pola empresa en La Felguera d’Arriba. Adautándose a la orografía, les viviendes allíniense de forma escalonada. Les casas, apariaes, respuenden a dos modelos: agospios unifamiliares agrupaos de dos en dos, organizaos a una sola altura y con entrada independiente; y cases bifamiliares, distribuyíes en dos pisos, agrupaes n’unidaes de cuatro viviendes con entrada compartida. 

Les viviendes unifamiliares –un total de doce– llocalícense na zona inferior y intermedia de la lladera de La Formiguera, mientres que les cases del segundu tipu, construyíes nun momentu posterior, asítiense na cota más alta. La solución de vivienda adoptada, el cuartel, nun respuende en cualquier casu a los mesmos esquemes que carautericen a esta tipoloxía na cuenca d’El Caudal. Dos diferencies en particular separten entrambos modelos: l’ausencia de corredor nel pisu altu y la distribución n’altura ocasionalmente nuna sola planta. 

Polo que respeuta a la so organización, les viviendas apariaes unifamiliares presenten planta rectangular, inferior a los cincuenta metros cuadraos de superficie habitable, distribuyida en cocina, comedor, dos cuartos y retrete. De planta única y cubierta a dos agües, respuenden a una cenciella composición y tratamientu; la so única concesión decorativa son los vanos y ángulos de los estremos recercaos. 

Les cases asitiaes na zona alta de La Formiguera componen una alliniación de cinco unidaes, caúna d’elles con cuatro agospios, dando como resultáu un total de venti viviendes. Organícense en dos pisos comunicaos per escalera y, no que se refier a la so distribución en planta, inclúin cocina, tres cuartos y retrete. Nos murios ábrense cenciellos vanos adintelaos, con recercáu de lladriyu. 

Natalia Tielve García