Cuarteles de la SHE

El cuartel ye un tipu de vivienda coleutiva venceyáu al procesu industrializador y destináu al agospiu de trabayadores, que surde non de la evolución de formes de morada autóctones, sinón que se trata d’un modelu importáu poles empreses actuantes nel negociu mineru y metalúrxicu, de forma principal. Cuarteles obreros d’interés pa la documentación del procesu industrializador podemos atopalos, por citar dalgunos exemplos, en Lieres (minería de la hulla), n’Arnáu (metalurxa del zinc) o en Trubia (fabricación d’armes), pero ye na Cuenca del Caudal onde apaecen dalgunos casos que, como los qu’equí tratamos, presenten unes carauterístiques más diferenciaes. N’efeutu, l’allargamientu de la forma prismática, una mayor altura qu’otros modelos rexonales y que-y dexa desarrollar dellos pisos, o detalles cuidaos como les guardamaletes son aspeutos destacaos, pero ye’l corredor, ensin dulda, el más atractivu y carauterísticu de toos ellos. El corredor, que se dispón na fachada principal, contaxándose, poro, del so calter llonxitudinal, sirve como accesu coleutivo esterior económicu a los pisos altos, repitiéndose en caúna de les plantes que desendolca’l cuartel y coneutándose cola cai al traviés d’una escalera, tamién esterior, apegada a una de les medianeres. 

A la Sociedad Hullera Española (SHE) pertenecen los meyores exemplos conservaos d’esta tipoloxía, los cuarteles de La Torre, n’Uxo, y los de Santuyano, dambos de lo último del sieglu XIX. Trátase de cuarteles onde cada bloque, como ye carauterístico, presenta una mayor llonxitú qu’anchor y altor, con cubierta a dos agües y caballete paralelu a la fachada principal. Dambos grupos organícense en planta y dos pisos, siendo dos bloques n’Uxo y trés en Santa Cruz, magar qu’ún d’ellos presenta tresformaciones importantes. Les viviendes tienen ente cuarenta y cincuenta metros útiles, distribuyíos ente la cocina y dellos cuartos (ente trés y cinco). 

L’amplitú cronolóxica d’esta tipoloxía de cuartel con corredor y escalera d’accesu esterior llega hasta la Primer Guerra Mundial. El cuartel, tamién con corredor, pero yá con un accesu coleutivu a les plantes per una escalera interior tomaría’l relevu nes promociones residenciales siguientes.

Faustino Suárez Antuña