La instalación concluyóse nel 1924 y requirió de delles instalaciones específiques. Les más importantes llocalizáronse nos estremos del percorríu y el so centru neurálxicu asitióse n’Uxo, onde se llevantó un edificiu destináu al serviciu de les llocomotores llétriques al norte de la estación.
Nél axuntáronse funciones distintes: una nave con trés víes servía como depósitu pa estacionar les máquines; una segunda nave de menor anchor, pero equipada con una grúa-ponte, yera destinada a taller. Sobre la primer d’elles, un cuerpu central albergaba les oficinas de tracción y, a entrambos llaos, dos cuerpos guarnecíos con torres y que se destinaben a viviendes del personal de lletrificación. Los materiales de construcción emplegaos foron el lladriyu prensao y la mampostería encarao, con cubiertes soportades por cerches metáliques.
Los planos confeccionáronse nel 1924, firmaos pol inxenieru Francisco Castellón Ortega, anque en realidá la so construcción entamara un añu enantes, requiriendo importantes trabayos de desmonte y cimentación. Cuando, nos años cincuenta, la lletrificación s’estendió hasta Xixón, los llabores de mantenimientu desplazáronse al depósitu nuevu d’Uviéu, polo que les instalaciones d’Uxo pasaron a facer la función de taller de material remolcao.
A entamos de los ochenta, estos llabores foron al empar trensferíos al taller nuevu de Llugo. Dende entós, l’edificiu usóse namái como vivienda.
Esti edificiu constitúi una muestra única dientro de l’arquiteutura ferroviaria española, innovadora nel so plantegamientu y combinando nuna única fábrica funciones diferentes con una estética monumental.
Guillermo Bas Ordóñez
Comentaris recents