Edificiu Central

Esi edificiu alministrativu fai d’entrada principal a la planta. Construyíu en piedra, presenta pequeños vanos, en contraposición al restu d’edificaciones productives de la fábrica. Tien un marcáu sabor historicista que recuerda a l’arquiteutura palaciega y los edificios abaluartaos, coronáu per aciu d’almenes que-y dan un evidente porte militar, dalgo que nun ye casual. Cuenta con un total de trés plantes bordiaes por dos cuerpos en forma de torre y una amplia azotea onde ta’l reló que marcaba los tiempos de l’actividá industrial. La so planta, en forma de ‘C’, paez querer abrazar al recintu que da pasu.

La planta baxa del edificiu, amás de la entrada al traviés d’un gran portal, acoyía funciones alministrativas y de seguridá; con una intención artística, apaez bordiada por escultures qu’imiten proyeutiles de gran calibre. Llégase al primer pisu per unes escaleres de madera onde taben elementos artísticos diversos, como bustos de militares destacaos o tapices que representen llugares venceyaos a la historia militar, como l’Alcázar de Toledo. La planta principal, xunto con otros usos, allugaba la sala d’aconceyamientos o’l despachu del direutor, rescamplando los artesonaos policromaos  fechos con yelsu y qu’imiten la madera, los amplios zócalos o les vidreres de los vanos que representen emblemes del Cuerpu d’Artillería, al que pertenecía la factoría. Inclusive elementos llamativos, como’l bañu ‘escondíu’ tres una puerta falsa qu’imita al zócalu del despachu del direutor. Unes pequeñes escaleres de caracol dan accesu a l’azotea, llugar privilexáu pa ver tol conxuntu de la Fábrica d’Armes de La Vega y comprender la trama d’esti espaciu urbanu qu’ocupa una superficie de 120.000m2. 

Manuel Antonio Huerta Nuño