Destináu a la fabricación mecánica de pieces de cañones p’armamentu, el taller de planta rectangular y dimensiones notables –con una superficie de 5.184 metros cuadraos– asítiase nel marxe nordeste de la factoría. Imperando nel so diseñu la racionalidá constructiva, presenta una estructura de formigón armao, con cubierta de forxáu cerámico, bovedilla y teya plano. La cubrición de forxáu nervao de cerámica constitúi precisamente ún de sus llogros teunolóxicos más notorios: un sistema económicu que permite, pola so llixereza, reducir de manera estraordinaria les emburriadures, al tiempu qu’ameyora les condiciones térmiques y l’aisllamientu del interior. Un sistema que l’inxenieru Sánchez del Río, fundador de la fábrica Río Cerámica y de la empresa Dragados y Construcciones, desendolcó en dalgunos de los sos más notables proyeutos y que fixo d’él ún de los grandes especialistes n’España na construcción de cubiertes de formigón armao y d’estructures llaminares de grandes lluces allixeraes con pieces cerámiques.
La solución de cubierta adoptada, de perfil de dientes de sierra, da llugar a la formación de trés llumeres verticales, una por cada una de les naves nes que de forma interna s’organiza l’espaciu, con idéntica altura, proporcionando unes condiciones d’illuminación ventayoses. A ello contribúin los amplios ventanales acristalaos que calen los murios, de marcada tendencia horizontal. N’alzáu l’edificiu desarróllase al traviés dos niveles superpuestos, correspondientes a suétanu y planta, mientres que na zona de la entrada asítiase un cuerpu dotáu d’un pisu n’altura, al que s’accede per una escalera interna, destináu a almacenes y baños.
Incluyíu nel 2001 nel Rexistru de l’Arquiteutura Industrial patrocináu pola Fundación DoCoMoMo Ibérico, el Taller de Cañones, ensin usu dende la clausura nel 2012 de les instalaciones, convirtióse en sede ocasional d’eventos culturales.
Natalia Tielve García
Comentaris recents