Escuela d’Aprendices

Elorza viaxara peles principales zones industriales europees col oxetivu de ganar conocimientos, pero tamién contratar personal cualificao, ente ellos dellos maestros industriales como’l moldiador Charles Joseph Bertrand, el grabador Pedro J. Gosset o’l calentador de fornos Diego Pool, ente otros.

El Decretu Fundacional d’esta escuela data del 1 de xineru del 1850, entamando les clases al día siguiente de la festividá de Reis; con ella nacería la Formación Profesional n’España, siendo la primera del nuesu país. Sicasí, de manera oficiosa, yá dende’l 1844 veníen poniendo clases dellos oficiales del Cuerpu d’Artillería; de tomar esta fecha, podría considerase la primera d’Europa. Nella non sólo se formaron futuros trabayadores pa la Fábrica d'Armes de Trubia; munches de les grandes empreses españoles nutriéronse de mano de obra cualificao formao equí.

Los alumnos instruyíense a lo llargo de cuatro años con clases teóriques y práutiques, otorgándose dende’l 1944 el Premio Elorza al númberu ún de cada promoción, lo que significaba la so entrada darréu na fábrica. A lo llargo de la so historia la escuela cambió poco, namás naquellos aspeutos necesarios p’adaptase a los nuevos tiempos, siendo la norma de referencia’l Reglamentu d’Aprendices pa la Escuela d’Artes y Oficios de la Fábrica de Trubia, aprobáu’l 23 de xunetu de 1891.

Foron dellos los allugamientos de la escuela, primero dientro del recintu fabril, en diversos talleres; a lo último del sieglu XIX treslládase a la zona conocida como ‘El Borrón’, cercana al Taller d’Artillería. L’asitiamientu postrer sería l’edificiu construyíu como Escuela d’Aprendices, onde s’impartiríen les clases dende’l 1959 hasta’l so cese nel 1987. D’inspiración neoclásica, anguaño sigue acoyendo funciones educatives al ser sede del IES Río Trubia.

Manuel Antonio Huerta Nuño