Nos sos primeros años la escuela desarrolló’l so llabor en dellos llocales, hasta que nel 1927 se centraliza nun edificiu diseñáu a esi fin y que sigue los criterios estéticos y pedagóxicos de la época. Trátase d’un volume rectangular con una estructura d’aceru que permitió grandes alturas de suelu a techu; ye de lladriyu visto y presenta ventanales amplios onde la ventilación y illuminación tuvo gran importancia atendiendo tanto a criterios hixenistes como práuticos. Na so fachada un frontón recibe al visitante col nome del edificiu, al que s’entra per unes escaleres solemnes.
L’interior de la escuela entovía evoca’l so pasáu. L’estragal presenta un destacáu suelu de baldosín hidráulico y la decoración cobra cierta importancia al traviés d’elementos diversos como escudos de cuerpos del Exércitu, los zócalos de madera o un techu fechu d’escayola policromao. Esti espaciu da paso a lo que foi’l taller, onde se poníen les práutiques con maquinaria diverso, un espaciu diáfanu y de lluminosidá grande; una ventanina pequeña comunicaba cola estancia onde se guardaben los moldes y ferramientes, que teníen que pidise al personal esistente.
Unes escaleres de madera magnífiques dan accesu al segundu pisu, onde se situaben los despachos del profesoráu, les aules y la sala de dibuxu, con dimensiones y lluz, pelos so ventanales grandes orientaes al sur, que faen d’ella un llugar cuasi máxicu. Nes paredes de tol edificiu apaecen frases que recuerden la naturaleza del espaciu, como la que recibe al visitante namás entrar: “Amái y respetái esta Escuela”, toa una declaración d’intenciones y una muestra de que la Escuela d’Artes y Oficios de La Vega ufre ún de los patrimonios fundamentales d’esti espaciu industrial, l’inmaterial.
Manuel Antonio Huerta Nuño
Comentaris recents