Estación de Soto Rei

Tresportes

Estación de Soto Rei

Soto Rei, La Ribera

Soto Rei nació como un allugamientu venceyáu de manera estrecha a la minería y la industria. El so establecimientu debióse a la necesidá d’establecer un empalme col nuevo ramal que se biforcaba de la llinia Lleón-Xixón hasta Ciañu-Santana (güei L’Entregu).

El trazáu inauguróse nel 1894 y, con ella, esta estación dedicada a les maniobres y formación de trenes destinaos o procedentes de los centros industriales del valle d’El Nalón.

D’esi primer momentu consérvase l’edificiu de viaxeros, una construcción cenciella rectangular de dos plantes fecha en mampostería enllucío y lladriyu visto. Cuenta con una marquesina metálica de fundición instalada posteriormente con restos aprovechaos de la vieya estructura de la estación d’Uviéu.

Esti tipu d'instalaciones yera oxetu de frecuentes reformes pa modernizar y aumentar la so capacidá. En Soto Rei atopamos dellos testimonios d’esi procesu: nel andén principal se llevanta un pequeñu pabellón destináu al serviciu de correos, formáu por una construcción rectangular de planta baxa.

Del 1923 data otro edificiu singular, el chigre, construyíu xunto a la propia estación y de planta cuadrada, con un interesante vanu termal na so fachada delantera.

Cuasi al empar llevantóse un pabellón de viviendes pa capataces, asitiaes un poco más al norte, paraleles a les víes. Tán formaes por un edificiu allargáu, de mampostería concertao y decoración de lladriyu, dividíu en cinco cases, caúna con un pequeñu xardín.

Pero ensin duda la construcción más llamativa ye la cabina d’enclavamientos númberu 1, na entrada del llau Lleón, destinada a maniobrar los cambios de vía y señales de la estación. Ye un edificiu singular de planta hexagonal con cubierta de pizarra, aleros mui volaos y unos grandes ventanales pa que los emplegaos controlasen el tráficu ferroviariu. La so decoración céntrase nuna ellaborada barandiella y nes estrelles de cinco puntes que yeren l’emblema de la Compañía del Norte.

Soto Rei ye ún de los conxuntos ferroviarios meyor conservaos d’Asturies, con testimonios de distintes tipoloxíes d’edificios que reflexen múltiples aspeutos de la esplotación ferroviaria, dalgunos yá desaniciaos.

Guillermo Bas Ordóñez

 

GALERÍA D'IMAXES