Fornos Altos – Muséu

Nel 1860 Chauviteau encargaría al inxenieru francés Gabriel Heim un informe pa determinar la esistencia y calidá de los carbones y fierros del conceyu quirosanu; daes les bones espectatives, crearíase la Sociedad Hullera de Quirós cola fin de trabayalos. Nel añu 1865 esta empresa refúndase col nome de Compañía de Minas y Fundiciones de Santander y Quirós, responsable de crear un sistema siderúrxicu integral nesti territoriu arispiu y mal comunicáu.

Una de les primeres decisiones foi determinar l’asitiamientu de la planta, una pequeña vega na oriella izquierda del ríu, ente Arroxo y Bárzana, anguaño conocida col esplícitu nome de La Fábrica. L’allugamientu nun foi casual: nun radiu d’apenes cinco quilómetros contaba con grandes xacimientos de carbón y, sobre manera, col esceicional depósitu de fierro de Los Ḷḷamargones. El 1 de xunetu del 1870 prenderíase l’únicu fornu col que contó. El so tamañu pequeñu, males comunicaciones y competencia fadríen que la compañía entrase en crisis y entamara una reestructuración que principió col apagáu del so fornu nel 1877.

A partir d’esi añu iníciense les obres d’un taller de llaminación en Trubia y, sobre manera, la construcción d’un ferrocarril ente esta población y la planta siderúrxica, obra proyeutada una vegada más por Gabriel Heim. Los talleres nuevos empecipiaron a funcionar nel 1881, nel 1883 prenderíase un segundu fornu y al añu siguiente inauguraríase’l trazáu ferroviariu. Magar estes midíes, la factoría de Bárzana nun podía competir coles grandes siderurxes de la rexón y nel 1888 Fábrica de Mieres faise con tolos sos activos, treslladando a la so factoría los trenes de llaminación de Trubia y destinando la fundición de Quirós a algamar lingote baratu hasta l’abandonu definitivu de les instalaciones na década del 1910. Anguaño acueyen el Muséu Etnográficu de Quirós, conservándose apenes la muria de contención y la base d’ún de los fornos, asina como delles galeríes soterrañes.

Manuel Antonio Huerta Nuño