Imprenta

De tamañu pequeñu, tien una estructura de lladriyu visto; construyóse na primer época de la fábrica. Presenta’l teyáu fundíu parcialmente y cuenta con dellos vanos en forma d’arcu de mediu puntu con ventanes de madera que yá apenes esisten. Nel so interior, como si d’una alegoría se tratara, caxones rotos y esperdigaos pel suelu acueyen les pieces tipográfiques que s’utilizaron a lo llargo de décades pa imprentar infinidá de cartafueyos, órdenes de fábrica, manuales y toa aquella documentación necesario pal funcionamientu industrial que remarca’l calter autosuficiente d’esti tipu d’industries militares, como amuesa la esistencia d’otra más antigua na Fábrica d’Armes de Trubia.

Manuel Antonio Huerta Nuño