Claustru

Hai que se remontar al añu 1153 pa dar col so orixe de la mano de doña Gontrodo, amante d’Alfonso VII, rellación de la que nació la reina Urraca; nesi añu formalízase la fundación del monesteriu de Santa María de La Vega, sometiéndolu a la congregación francesa de Fontevraud qu’acoyía a muyeres procedentes de la nobleza.

Dientro del recintu fabril entovía queden restos d’esi pasáu, como los elementos románicos incluyíos na capiella de Santa Bárbola, reconstruyida nel 1927 por Menéndez Pidal. Pero ensin dulda’l más llamativu ye la presencia d’una gran arcada de sillería nel interior d’un edificiu qu’acoyó les funciones d’almacén, nuna simbiosis ente’l pasáu monásticu y l’industrial onde máquines vieyes y plaques de fundición colos nomes de les cais del recintu industrial permanecen a la espera d’una segunda vida.

Nel sieglu XVII la congregación de La Vega fixo reformes de la so sede, cola construcción d’una nueva portería de triple arcu nel 1643 y la remodelación del antiguu claustru románicu per otru, que siguía una estética barroca; contaba con seis arcos apoyaos sobre columnes en caún de los sos cuatro llaos, sobre los que corría una llinia d’imposta. El so autor sería Gregorio de la Roza, que fixo la obra hacia’l 1670; esti mesmo arquiteutu, a lo último d’esa centuria, realizaría la ilesia nueva.

L’arcada que se conserva, sicasí, ye resultáu d’una reforma muncho más ambiciosa fecha ente’l 1751 y el 1753, cuando Pedro Antonio Menéndez fai un claustru nuevu de cuatro altures. Tres el treslláu de les monxes en xunetu del 1854 y la conversión d’espaciu en fábrica d’armes, nel 1917 échase abaxo la ilesia, el coru y la portería, incluyendo una torre románica, y esmantélase la parte superior del claustru, conservando namái’l pisu inferior, que cuenta con seis arcos en cada llau encontaos sobre pilares. Envolviendo esta arcada construyóse un edificiu con dellos balcones y la carauterística cubierta de diente de sierra p’aporta-y lluminosidá.

Manuel Antonio Huerta Nuño