Industries
El periodu de cambiu de sieglu del XIX al XX foi favoratible pal negociu del azucre n’España. Del cuasi mediu centenar de plantes moledores abiertes n’España nesti periodu, cinco foron n’Asturies, siendo la de Pravia la mayor de toes elles. Un impresionante edificiu d’enormes dimensiones que sólo funcionó dos campañes, pesllando nel 1903.
La perda de los últimos territorios españoles d’ultramar énte los estauxunidenses nel 1898, anque realmente nun impidiera la continuación de los negocios ellí, promovió la vuelta d’importantes capitales a España. Esto, xunto a la progresiva xuba internacional del preciu del azucre dende la década última del sieglu XIX, l’arancel azucreru, ente otres razones, animó la producción nacional y la creación de numberoses plantes moledores nel territoriu peninsular. Esti azucre, salvo territorios mui concretos, ente los que nun ta Asturies, algamábase a partir de la remolacha y non de la caña. Asina, crearíense hasta 5 fábriques d’azucre nesti periodu na mariña central asturiana, siendo la de Pravia una de les mayores fábriques moledores, hasta’l puntu de que los trenes podíen llegar a entrar nel so interior.
Como toles plantes asturianes, la de Pravia tenía una maquinaria moderna, suministrada pola casa alemana BMA especializada na maquinaria azucrera, que-y permitía moler 350 tm diaries d’una remolacha que se cultivaba nes tierres cercanas, pero tamién nes vegues de Candamu, Miranda y Salas… Amás, la so conexón al Ferrocarril Vasco Asturiano diba-y dexar sacar la so producción pel puertu de San Esteban. Sicasí, tan aparentemente bonos cimientos resultaron insuficientes: la fortísima competencia –creáronse cuasi 60 plantes n’España–, el tamañu reducíu del so mercáu direutu y unos costos de producción altos llevaron al so pieslle tres la zafra del 1902-1903, funcionando namái dos campañes.
Un imponente edificiu avaráu como un inmensu tresatlánticu, cola so chimenea de 45 metros, a les afueres de la villa praviana. Sólo a partir del 2010 va entamase cola so rehabilitación, entovía non concluyida y, ciertamente, poco respetuosa.
Magar la triste historia del azucre asturiano, la remolacha, xunto cola mazana y la sidra, la lleche o l’ablana, permitieron al campu asturianu entrar definitivamente na economía de mercáu, estrictamente monetaria. Un dineru que l’agro emplegaría na so modernización, ameyoramientu y crecimientu.
GALERÍA D'IMAXES
Comentaris recents