Llocomotora HT 120

El so valor históricu ta na peculiaridá de ser un productu totalmente orixinal, ensin carauterístiques que la permitan adscribir a nengún de los grandes constructores de material ferroviario. Los téunicos de Hulleras de Turón copiaron los rasgos que consideraron más amañosos de les llocomotores más próximes (Compañía del Norte y Vasco Asturiano) y fusionáronlos nun diseñu adautáu a unes necesidaes peculiares, que combinaben l’arrastre de trenes nuna llinia principal coles maniobres pa la clasificación y cargue de vagones.

La operación foi posible gracies a la esperiencia adquirida de manera previa cola reforma d’otres máquines y la construcción, trés años enantes, de la so hermana pequeña, la númberu 110, aprovechando pieces de recambiu. Tien trés exes motores con cilindros y distribución esteriores pa facilitar el so caltenimientu, caldera de vapor recalentao y tanques llaterales pal agua, con una carbonera asitiada na parte trasera de la cabina.

Puesta en marcha nel 1931, dio serviciu 45 años hasta que se retiró en tiempos d’HUNOSA tres la llegada d’una llocomotora diésel. A lo llargo de la so carrera apenes sufrió modificaciones, anque’l so diseñu careció de dalgunos defeutos por mor d’esi calter esceicional. Llueu de tar años abandonada, el Muséu del Ferrocarril d'Asturies, onde s’espón güei, rescatóla y rehabilitóla.

La rareza d’esta máquina conviértela nuna pieza fundamental del patrimoniu ferroviariu asturianu y nuna de les meyores amueses del proyeutu industrial fechu pola HT, asitiándola a la vanguardia del sector hulleru del Principáu.

Guillermo Bas Ordóñez