Tresportes
372926752
Mina La Camocha
375428265
Muséu del Ferrocarril
527488872
Llocomotora SAF Nº1
La mina La Camocha convirtióse depués de la Guerra Civil nuna importante productora de carbón. Pa da-y salida acometió la construcción d’un ramal de vía ancha ente les sos instalaciones y la estación de RENFE de Veriña, puestu en serviciu nel 1949. Esplotáu orixinalmente con material arrendao, la empresa adquirió la so propia llocomotora trés años más tarde.
Construyóla la firma alemana Henschel, una de les de más sonadía nel campu de les máquines industriales. Tenía dos exes acoplaes, distribución esterior y tanque d’agua nel bastidor, carauterístiques típiques d’esti tipu d’exemplares. Recibió la denominación SAF Númberu 1, que correspondía al acrónimu de la Sociedad Anónima Felgueroso, propietaria orixinal de La Camocha. Posteriormente la so titularidá pasaría a manes de la Minero Siderúrgica de Ponferrada.
La SAF dio serviciu nel ramal de La Camocha hasta mediaos de los setenta, cuando se retiró tres l’adquisición d’una llocomotora diésel. Quedó depués apartada munchu tiempu, pero finalmente nel 1994 cedióse al Muséu del Ferrocarril d’Asturies, que fixo la so restauración y puesta de nuevo en funcionamientu.
Dende entós se convirtió nún de los símbolos de la institución y circula con regularidá con motivu de les xornaes del vapor qu’entamá’l muséu y, inclusive, llegó a participar nel rodaxe de dalguna película.
La SAF Númberu 1 ye una amuesa escelente de les llocomotoras industriales de construcción moderna, yá que foi una de les últimes encargaes por una empresa minera cuando esti tipu de tracción taba a piques de llegar al so declive. Amás, ye l’únicu exemplar de vía ancha n’estáu de funcionamientu n’Asturies.
GALERÍA D'IMAXES
Comentaris recents