Llocomotora Upina

En concreto esti exemplar construyólu nel 1890 la firma Krauss de Múnic, un fabricante especializáu en llocomotores industriales qu’ufría dellos modelos adaptaos a les necesidaes específiques de los sos clientes. La nuesa protagonista pertenecía a ún de los tamaños más pequeños, con un pesu que nun llegaba a les cuatro tonelaes y presenta carauterístiques propies de diseños industriales, con dos exes motores y tanque d’agua nel bastidor. Adquiróla la sociedá Julio Bertrand, que contaba con delles esplotaciones hulleres na zona media de La Güeria San Xuan, en Mieres. 

La empresa punxo un ferrocarril con anchor de vía de 600 milímetros dende la cabecera de les sos esplotaciones, en Cueves, hasta un planu inclináu que descendía al propiu cascu urbanu de Mieres. Nesa llinia dio serviciu per décades xunto con otres máquines más modernes, mientres que la so propiedá foi pasando per delles manes según el negociu camudaba de propietarios. El so dueñu últimu sería Minas Tres Amigos, sociedá constituyida na década del 1940 y que s’integró n’HUNOSA nel añu 1969.

Depués del pieslle del ferrocarril, asocedíu nel 1956, la UPINA terminó faciendo maniobres na seición qu’aunía El Casar col Pozu Tres Amigos hasta que, en pasando diez años, retiróse. Pasó a manes d’HUNOSA y salvóse del esguace cuando s’escoyó pa ser colocada como adornu nos xardinos del llavaderu d’El Batán pol so tamañu pequeñu.

D’esi allugamientu pasó finalmente nos años noventa al Muséu de la Minería de L’Entregu, onde s’espón güei depués d’una restauración cosmética.

La llocomotora, qu’anteriormente nun tenía denominación nenguna, bautizóse nos años de la Posguerra como UPINA, un nome peculiar que deriva del apellativu familiar de Guadalupe Sela Álvarez, fía del direutor de Minas Tres Amigos naquel momentu.

Guillermo Bas Ordóñez