Mina La Camocha

Nel 1901 los hermanos Felgueroso, socios y contratistes de la mallograda Compañía de los Ferrocarriles de San Martín-Lieres-Gijón-El Musel, entamen los sondeos na parroquia de Samartín de Güerces pa l’apertura d’un pozu vertical d’estraición destináu a beneficiar el xacimientu que, na construcción d’un túnel del mentáu ferrocarril, detectaren. Los sondeos tuvieron grandes retrasos, dilatándose hasta la década del 1930 l’apertura del pozu.

En La Camocha afondáronse trés pozos verticales: dos de los años trenta, y el terceru del final de la década siguiente, anque’l pozu 1 pasaría a llabores auxiliares nel 1940. Xunto colos pozos apaecen toles instalaciones necesaries d’una mina, como oficines, llavabos, llavaderu de carbón y un ramal ferroviariu hasta Veriña que, aprovechando los desmontes del inacabáu Ferrocarril de Lieres, sacaba la producción de la mina. Alredor d’ésta, tou un pobláu foi medrando, con viviendes de densidá mediana y baxa pa dar agospiu a un creciente númberu de trabayadores y les sos families.

El pozu númberu dos caltuvo hasta’l 1996 una máquina d’estraición d’enerxía a vapor, una auténtica xoya fabricada pola firma alemana GHH nel 1921, que trabayó en Xixón dende’l 1932, llegando a ser la única pieza d’estes carauterístiques qu’entovía operaba n’Europa, y qu’anguaño ta depositada nel Muséu de la Minería d’Asturies (MUMI). 

Pero La Camocha ye conocida tamién pol guapu cantar con lletra de José León Delestal, mui popular n’Asturies, na que les estrofes más famoses falen de cómo la mina va baxo la mar y los mineros sienten les foles bramar… Anque lo cierto ye que la única mina submarina del Principáu taba n’Arnáu, mientres que La Camocha sólo esplotó zona continental.

Nel 1945 la mina sal de la esfera de la familia Felgueroso por problemes financieros, pasando per delles manes hasta lo último del 2007, cuando atranca les sos puertes de manera definitiva.

Faustino Suárez Antuña