Minería
Nel 1916 créase Carbones de San Vicente, nunes concesiones qu’esplotara l’empresariu Gaspar Martínez, fináu nel 1894. La empresa nueva afondará un pequeñu pozu vertical, pero problemes téunicos y una xestión deficiente faen medrar unes deudes que namái son controlaes con un préstamu del Sindicato de los Mineros de Asturias (SOMA), esmolecíu polos trabayadores de la mina nun contestu difícil pal carbón tres el final de la Gran Guerra.
Sicasí, ún de los socios, Víctor Felgueroso Figar –fíu de Constantino, ún de los míticos hermanos Felgueroso– desapaez col dineru, lo qu’acaba forzando al SOMA a tomar el control de la mina nel 1926 y a ser el so propietariu un añu más tarde.
La esperiencia d’autoxestión obrera del Pozu San Vicente ye un casu único y una demostración de cómo les coses pudieron ser d’otru mou. De fechu, cola ayuda del Gobiernu primorriverista, la mina saldó deudes, atopó mercaos seguros pal so carbón y pudo aplicar ameyoramientos llaborales na duración de la xornada, salarios, atención médica, vale de carbón…, invirtiendo amás na modernización teunolóxica d’una mina descapitalizada polos propietarios anteriores. Un bon exemplu ye la compra nel 1929 d’una máquina d’estraición AEG por 58.000 pesetes. Pero too ello llegaría al so final cola cayida d’Asturies en manes sublevaes. Asina, nel 1938, el Gobiernu franquista requisa la mina pasando primero a la Delegación Nacional de Sindicatos y, nel 1957, a una empresa nueva, Hulleras del Rey Aurelio S.A (REYASA). Nel 1970 HUNOSA adquier les instalaciones por mor de les filtraciones que se producíen nel cercanu Pozu María Luisa.
Ente’l 1998 y el 2000 les instalaciones del Pozu San Vicente sufriríen una intervención por parte d’una Escuela Taller de la Fundación de las Comarcas Mineras (FUCOMI) lo que, aunío a l’apertura d’una galería soterraña de comunicación col Muséu de la Minería na década siguiente, habría de convertir el pozu nun Muséu del Movimientu Obrero venceyáu al MUMI. Un proyeutu que sigue esperando a ser una realidá, si bien el tresversal incorporóse a la visita del muséu.
GALERÍA D'IMAXES
Comentaris recents