Mines de La Parva

La primer esplotación d’estes mines va del 1796 al 1808, una vez comiencen a funcionar los fornos altos de Trubia. Apenes son destacables los trabayos, con una producción mui baxa y un mineral de mala calidá; d’esta época queden restos d’una vivienda, posiblemente de los mineros. Tres l’abandonu de la producción en Trubia por mor de la guerra con Francia, habrá qu’esperar la llegada d’Elorza a la direición de la fábrica d’armes pa retomar l’actividá d’estes mines.

A partir del 1844, la Fábrica d’Armes de Trubia faise cargu de les minas de Castañeo’l Monte, siendo la so propietaria. Tres dellos análisis, entamen a esplotase les sos mines, siempre con producciones baxes. L’abandonu de l’actividá siderúrxica en Trubia nel 1866 fadría que cesase’l trabayu nestes mines, que son requisaes pola Real Hacienda nel 1881. Entovía habrá un intentu postreru d’esplotación cuando nel 1900 se constitúi la Compañía Minera de Castañedo del Monte, de capital asturianu. Magar les sos intenciones, nunca fadría llabor nengún, caducando les sos concesiones nel 1935 y quedando les mines abandonaes hasta la so recuperación como recursu cultural y turísticu per parte del Conceyu de Santo Adriano nel 2015.

La redolada de La Parva conserva dellos llabores de metanes el sieglu XIX; presenta trés niveles superpuestos compuestos por trés bocamines y dos grandes cortes a cielu abiertu, a les qu’hai que sumar un gran desmonte que cuenta con más d’una ventena de pequeñes galeríes que nos amuesen la téunica de güecos y pilares, esto ye, según s’escavaba dexábense ente les galeríes zones macices (pilares) que suxetaben la mina, ensin necesidá d’entibación como nel casu de les galeríes. Pel camín que va a les mines, abiertu na época de la esplotación, consérvense dellos murios de contención. Inclusive’l propiu regueru, col su fondu acoloráu, alude a la presencia de fierro nestes tierres.

Manuel Antonio Huerta Nuño