Mines de La Soterraña

Estes esplotaciones de mercuriu asítiense a unos 5 quilómetros al noroeste La Pola Ḷḷena, siendo oxetu d’estraición intermitente dende’l 1845 hasta entamos de la década de los setenta del sieglu pasáu.

Les denuncies mineres iniciales na zona (unes 40) tuvieron llugar ente’l 1844 y el 1854, y los sos responsables principales foron les empreses Anglo-Asturiana, El Porvenir, La Constancia y La Concordia.

Entamaron l’actividá minera una empresa asturiana, La Concordia de Mieres, y otra inglesa, Asturian Mining Company. A partir del 1848 constitúise la Sociedad Minas de La Soterraña y estableciéronse sistemes de trabayu y metalúrxicos modernos.

L’asociación mineral principal comprende cinabriu (sulfuru de mercuriu), realgar (sulfuru d’arsénicu) y, en muncha menor proporción, oropimente (otro sulfuru arsenical). Apaez en mases irregulares de calcita encaxaes en niveles carbonataos del Carboníferu (Grupo Lena), xeneralmente ricos en materia orgánica o carbonosa. Les concentraciones mayores apaecen nes piedres caliares más afeutaes pola teutónica, o cuando calistren un nivel de carbón asitiaos al muru d’ún de los tramos calcáreos. Acompañen a los sulfuros mencionaos otros de fierro (pirita y marcasita).

Nestos xacimientos ḷḷenizos hai cuantíes altes de mercuriu y, en menor grau, d’arsénicu, qu’impurificaron tanto los suelos como l’agua, la vexetación y l’aire. Dende’l trabayu y el posterior tratamientu metalúrxicu d’esti tipu de menes esistió una clara inquietú daes les secueles que se derivaben d’éstos, yá qu’amás de los daños humanos ocurríos por hidrarxirismu, esta actividá industrial produxo perxuicios frecuentes nel perímetru de les esplotaciones, ente los que rescamplen l’acumulación d’estériles nocivos nes escombreres, degradación de los suelos, merma na calidá de les agües, mengua de la biodiversidá, impautos visuales delatadores, etc., que nun se corrixeron entá.

Carlos Luque Cabal y Manuel Gutiérrez Claverol